يوم غريب جدا إبتدى بإن ختم النسر مش باين

شارك المقال

Share on facebook
Facebook
Share on twitter
Twitter
Share on linkedin
LinkedIn

قمت النهارده الصبح بدرى ورحت السجل المدنى علشان أطلع بدل فاقد للرقم القومى ، ولما رحت وقدمت الإستمارة الموظفة قالتلى دى بتاريخ قديم ما ينفعش، يهديكى يرضيكى مافيش ، قلتلها طب يعنى سيادتك هى الإستمارة إية مشكلتها ؟؟ قالتلى إنها بتاريخ قديم؟؟ و إنها كدا مش متأكده إذا كنت لسة مقيد فى الكلية ولا لا لان التاريخ اللى فى الإستمارة من السنة اللى فاتت ، وأصل الحكاية إن أنا بطاقتى ضاعت ورحت عملت إستمار جديده وبعد كدا لقيتها فركنت الإستمارة وضاعت تانى البطاقة فإستخدمت الإستمارة ، ومن هنا لهنا قالتلى لازم أجيب ورقة تثبت إنى لسة مقيد فى الكلية !! يا للهوى ، هسافر كل المسافة دى علشان أجيب ورقه تثبت انى مقيد مع إن البطاقة أساسا بدل فائد ، أحا يعنى ، وريتها الكرنية بتاع الكلية، قبلتة عن كره وقالتلى روح صورة ، رحت صورته وجيت ، حلو؟ لا مش حلو ، بصت على ختم النسر كدا ، وبعين خبيرة ، خبيرة خبيرة يعنى وبعدين قامت مطلعه عدسة مكبرة وقعدت تبص على الختم ، تبص على الختم ، وهووووووووب ،وبصوت عالى قالت ” يا أم أحمااااااااااااااااااااااد” ثوانى وكانت أم أحمد واقفة قدامنا قامت قالتلها “والنبى شوفى كدا الختم دا باين ولا لا” وأم أحمد يبدو من شكلها إنها أكثر خبره ، أخدت منها العدسة المكبرة وبصت كدا على ختم النسر وقال ” لالا مش باين خالص” يا نهار إسود ، إية الهبل ، دانا وقعت فى سجل مدنى بتاع مجانين ولا إية ، ختم النسر باين أهو ، قلتلها بنرفزة “ماهو باين أهو مكتوب وزارة التعليم العالى ، دا حتى ختمين مش ختم واحد ، وبعدين دا بدل فاقد يا مدام ، مش محتاج ختم أساسا ، ما البيانات كلها عندكو ” وبعدين شورتلها على النسر وبعصبية قلتلها ” بصى بس هو باين أهو … نسر دا ولا مش نسر؟ نسر أهو ” قالتلى ما ينفعش وسابتنى ومشيت ، وخلتنى قعدت أبص كدا على النسر وأنا مرتاب فية الكارثة بقى فين ؟؟ إن موقع الحكومة المصرية أساسا بيطلع بدل فاقد من غير ختم ولا إستمارة ولا أى بطيخ

بعديها رحت مع والدى للعربية اللى بيتعملها عمرة ، لاقينا السمكرة زفت ، علمنا على الأماكن اللى عايزة تتسمكر من تانى ، ورجعنا للسمكرى أول ماشفها شخط فى فينا وقال ” مين اللى عمل العلمات دى ؟؟ ” وهاج وماج وإزاى حد يعدل على شغلة ، وإدايق أوى لانه متخيل إن المكنيكى هو اللى بيعدل على شغلة 🙂 نرفزنى وشديت معاه ، وأبويا يهدينى وأنا لا ممكن ، مع أنه أساسا ماعندوش ضمير ومسلم العربية زفت فى السمكره ودا كلة و متنرفز ، يعنى المفروض أخد العربية بعيبها وأمشى ولا إية يعنى؟ دى حاجه تخنق

رجعت البيت خلصان وعطشان جدا وكان فاضل شوية على الفطار لسة فتحت النت لقيت الأغرب ، أخبار كتير أوى غريبة

بيقولك طنطاوى بيقول”نحمد الله تعالي أن رزق مصر رئيساً مثل مبارك” بتحمد ربنا على إية راجل يا طيب

وصحيفة جزائرية نشرت فتوى بإن الزلابية حرام ، آه بجد ، فتوى تحريم الزلابية ، وبعد كدا الشيخ كذب الصحيفة وقال إن الزلابية حلال 🙂 وربنا حصل

وبعدين لاقيت خبر حادثة الدويقة بجد حاجه تزعل فعلا الله يرحم الضحايا وربنا يشفى المصابين يا رب

الخبر اللى أسعدنى بقى هو اللى قريته على العربية ، الخبر بيقول”باحثة سعودية :الرسول تزوج عائشة فى الـ19 على الأرجح “ وبغض النظر عن أن هذا الرأى موجود ومطروح قبل ذلك أكثر من مرة ، إلا أن ما أسعدنى أن هناك باحثات سعوديات يقولون بعكس ما يقوله التيار السلفى الوهابى المسيطر
يوم غريب جدا جدا بجد ،من أولة أساسا وأنا مش مطمن ، من ساعة ماالست طلعت العدسة المكبرة وقالتلى ” ختم النسر مش باين ” مع إنه كان باين ، نسر دا ولا مش نسر؟

اترك تعليقًا

لن يتم نشر عنوان بريدك الإلكتروني. الحقول الإلزامية مشار إليها بـ *