مبروك عليكو العلاوة

شارك المقال

Share on facebook
Facebook
Share on twitter
Twitter
Share on linkedin
LinkedIn

العلاوة 30% إتاكلت قبل ما تتاخد ، العلاوة نزلت قبل أربعه مايو ، والبنزين يغلا بعد أربعه مايو اللى حصل من اول ما مبارك ضحك علينا بحكاية العلاوة دى لحد دلوقتى عامل زى ما يكون مرحية
مبارك يطلع يقول للحكومة إعملوا علاوة 30% ، نجيب موارد منين يا ريس ، إتصرفوا وشوفوا موارد ، ومن هنا لهنا هوب العلاوة بقت واقع
ياسلام 30 % دى الناس دى طيبه أوى
فى مجلس الشعب يناقشوا أسعار البنزين والسولار والسجاير وغلوا البنزين بنسبة كبيرة جدا أكبر من المرة اللى فاتت بضعفيها تقريبا
بس ماتقلقوش العلاوة موجوده ومدام العلاوة موجده كله يهون
واحد صاحبى إشترى سلعه معينة أول إمبارح باليل وإمبارح إشترى نفس السلعه ، ولما لاقى إنها غليت 25 قرش فى كام ساعه سأل البائع هى غليت إيه؟ عارفين رد قال إيه؟؟ يا أستاذ دا البنزين غلى والسجاير غليت
مش بقلقوا والناس طيبين موت موت موت ، ومش مهم أى حاجه المهم العلاوة
اللى فعلا مش فادر أفهمه الحكومة دى بتفكر إزاى؟؟
دا زى ما يكون نظيف دا مجرد شخص ، بقى رئيس وزرا بس علشان يحصل كل اللى بيحصل دا والناس تكرهه هو ، يعنى واجهه كريهه للنظام بدل مايكون مبارك هو الواجهه دى ، حاسيت كدا لما مبارك هو أعطى الناس علاوة ووتانى يوم نظيف خدها منهم
عرفتوا دلوقتى نظيف هيجيب الموارد اللى تغطى العلاوة 30 % منين؟؟
والله ناس طيبين فعلا
بيقولك الحل الوحيد لما يكون فيه واحد ديكتور ومش عايز الشعب يقولة تلت التلاته كام إنه يجوع الشعب ، بس بالمهاود ، يعنى يجوعه أه بس مايموتوش من الجوع ، علشان يفضل من أول ما يصحى من النوم لحد ماينام بيشتغل يادوب علشان مايموتش من الجوع ، مش فاضى بقى يعرف إيه اللى بيحصل فى الدنيا ، المهم مايموتش من الجوع
أيام السادات كان فيه طوابير برده ، بس كانت فى الجمعية ، بيبيعوا فيها فراج ولحمة سودانى ورز وحاجات حكتير أحمدك يا رب
ولما رغيف العيش غلى حاجه بسيطة جدا الدنيا إتقلبت علية
يا حيلاوة
المهم إن العلاوة إتكلت وهو دا المهم والناس اللى بتدير البلد كذبوا علينا كذبة فشر كذبة هزيمة 67
إحمد عز بيقولك إن الخوف من زيادة الأسعار مجرد فلكلور إقتصادى ، وجمال مبارك عمال يتكلم عن دولة فى المريخ قدرت توفق بين الأجوز وإرتفاع الأسعار ، يا حيلاوة
أقل واحد فى مصر موصلاته كل يوم ذادت على الأقل جنية يعنى 30 جنية فى الشهر ، نقول ليه ولدين بيستخدوا الموصلات وقول يا سيدى الإتنين مع بعض موالاتهم ذادت جنية كمان ، بقى كدا 60 جنية فى الشهر ، بيدخن؟؟ خمسين قرش كمان؟؟ 75 جنية ؟؟

اترك تعليقًا

لن يتم نشر عنوان بريدك الإلكتروني. الحقول الإلزامية مشار إليها بـ *