حاجات كتير غير كابيتر هي اللي فعلًا لها تأثير سلبي على الاستثمار في قطاع الشركات الناشئة في مصر .
ماظنش إن تأثير كابيتر على استثمارات ريادة الأعمال في مصر هيكون شيئ ضخم. الوضع في العالم كله سيئ وفوق دا إحنا في مصر كدا كدا الايكوسيستم مضروب بالنار فإحنا عندنا ألف حاجة أسوأ بكتير من اللي حصل في كابيتر، بتأثر سلب على دخول الاستثمارات للشركات الناشئة في مصر.
يبدو إن الموضوع بقى أوضح بخصوص موضوع كابيتر، ستارت أب فشلت في انها تستمر، زيها زي ٩٠٪ من الشركات الناشئة. بغض النظر عن أسباب الفشل بس هو واضح إن الفريق ماكنش مبسوط وبيئة عمل الشركة والإدارة سيئين. والصحافة غالبا أفورت في الموضوع وحولت الفشل (اللي هو شيئ عادي للغاية) لاختلاس وسرقة.
ربنا يكرم الموظفين ويلافي مصادر دخل تانية.
موضوع كابيتر مهم لأسباب كتير، مش حاجة جديدة إن ستارت أب يفشل، ومش حاجة جديدة إن يكون فيه كلام عن عمليات نصب واحتيال في مجتمع ريادة الأعمال. من فترة كان فيه فضيحة كبيرة في وادي السيليكون لما الناس اكتشفت ، رائدة الأعمال اللي أسست شركة إسمها ثيرانوس وكانت الشركة وصل تقييمها لـ٩مليار دولار ، هي مجرد نصاية والجهاز اللي قالت إنه بيكتشف السرطان والسكر من الدم طلع فنكوش. وقبل كدا كان فيه حادثة في سنغافورة مع شركة اسمها زيلينحو، بتشتغل في التجارة الالكترونية، ومجلس إدارتها أقال المدير التنفيذي بعد اتهامات سرقة واختلاس، الشركة دي كانت أخدت تمويلات ٣٠٠ مليون دولار وطبعا في حوادث تانية كتير. ماسمعناش إن دا أثر أوي غلى مجتمع ريادة الأعمال في البلاد اللي حصل فيها النوع دا من المشاكل، ودا ببساكة لأن فيه إيكوسيستم ماسك نفسه وأطرافه عارفين بيعملوا إيه والأهم إن القوانين والسياسات والـregulations بتساعد إن النوع دا من المشاكل ما يبقاش مؤثر على مجتمع ريادة الأعمال ككل.
لو بنتكلم عن الحاجات اللي ممكن تخلّي بيئة ريادة الأعمال في مصر زي الزفت المستثمرين ورأس المال المخاطر يهرب من مصر، ممكن يبقى فيه حاجات تانية كتير غير كابيتر، أكيد تعقيدات القوانين وتعقيدات التراخيص والقوانين غير المناسبة لتمكين الابتكار وحتى تأخرنا في حاجات مهمة زي تقنين التمويل الجماعي أو تسهيل إجراءات فتح أو إغلاق الشركات، كل دي حاجات أكيد هي اللي تأثر سلبًا وبشكل حقيقي على الاستثمارات اللي بتضخ في الستارت أبس في مصر.
Menu
